ꤖꤢꤨꤋꤢꤨ꤭ ꤘꤣ ꤢ꤬ꤏꤤ꤭ꤗꤟꤢꤩ
ꤙꤢꤧ꤬ꤒꤣ꤬ꤖꤟꤌꤣ ꤖꤢꤧ꤭ ꤒꤣ꤬ꤕꤚꤟꤢꤧ꤬ ꤢ꤬ꤖꤢꤨꤕꤚꤟꤢꤧ꤬ꤋꤢꤨ꤭ ꤥ꤬ ꤞꤢꤧꤔꤛꤢꤩ꤭꤯ ꤒꤣ꤬ꤑꤢꤩ꤭ ꤖꤢꤨꤕꤚꤟꤢꤧ꤬ꤋꤢꤨ꤭ ꤊꤢ꤬ꤑꤢ ꤔꤌꤣ꤬ꤒꤣ꤬ꤕꤚꤟꤢꤧ꤬ ꤊꤟꤢ꤬ꤟꤢꤩ ꤢ꤬ꤖꤢꤧ꤭ ꤔꤢ “ꤖꤢꤧ꤭꤮ ꤚꤢꤦ꤭ꤓꤢꤧ꤭ ꤒꤟꤢ꤭ꤒꤟꤢꤧ꤬ ꤘꤣ ꤠꤢ꤭ ꤊꤢꤪ꤬ ꤔꤟꤤꤙꤢꤧ꤬ ꤞꤤ꤭ ꤒꤢ꤬ꤟꤢꤩ꤬ ꤔꤌꤣ꤬ ꤤ꤬ꤙꤢꤩ꤭ꤒꤟꤢ꤭ ꤊꤛꤢ꤭ꤗꤢꤪ꤭ ꤕꤢꤩ ꤠꤢ꤭” ꤚꤢꤪ ꤢ꤬ꤖꤢꤧ꤭ ꤤ꤬ꤙꤢꤩ꤭ꤒꤟꤢ꤭ ꤊꤛꤢ꤭ꤘꤢꤦ꤬ ꤕꤢꤩꤜꤢꤨ꤭꤯
ꤚꤢꤪ ꤖꤢꤨꤊꤢ꤬ꤑꤢ ꤛꤢꤩ꤭ ꤒꤣ꤬ꤕꤚꤟꤢꤧ꤬ ꤖꤛꤢꤩꤔꤟꤤ ꤜꤟꤢꤪ꤭ꤘꤢꤦ꤬ ꤚꤢꤦ꤭ꤓꤢꤧ꤭ ꤒꤟꤢ꤭ꤒꤟꤢꤧ꤬ ꤘꤣ꤮ ꤢ꤬ꤖꤢꤧ꤭ ꤤ꤬ꤙꤢꤩ꤭ꤒꤟꤢ꤭ ꤕꤢꤩ ꤜꤢꤨ꤭ ꤛꤢꤩ꤭ꤒꤢ꤬ꤟꤢꤩ꤬ ꤚꤢꤪ ꤢ꤬ꤓꤢꤩ꤬ꤡꤛꤣ ꤊꤛꤢ꤭ ꤘꤣ ꤊꤟꤢꤩꤐꤛꤢꤩ꤬ ꤚꤢꤪ ꤢ꤬ꤡꤛꤣꤜꤟꤢꤩ꤭ ꤢꤩ꤬ꤗꤟꤢꤦ꤬ꤥ꤭ꤕꤚꤛꤢ ꤒꤟꤌꤣ ꤔꤢ ꤢ꤬ꤋꤥ꤭ꤢ꤬ꤞꤛꤥ ꤖꤢꤨ ꤢ꤬ꤞꤢꤧꤐꤟꤢꤦ ꤥ꤬ꤓꤝꤟꤥ꤭ꤕꤚꤟꤢꤧ꤬ ꤔꤌꤣ꤬꤯ ꤑꤢꤩ꤭ꤒꤛꤢ꤬ꤒꤥ꤬ ꤢ꤬ꤚꤢꤦ꤭ꤢ꤬ꤓꤢꤧ꤭ ꤗꤢ꤬ ꤢ꤬ꤜꤟꤢꤪ꤭ꤜꤟꤢꤪ꤭ ꤢ꤬ꤋꤥ꤭ꤢ꤬ꤞꤛꤥ ꤗꤢ꤬ ꤢ꤬ꤥ꤬ꤕꤢ꤭ ꤒꤣ꤬ꤕꤚꤟꤢꤧ꤬꤮ ꤒꤥ꤬ꤒꤥ꤬ ꤢ꤬ꤋꤢꤨ꤬ꤢ꤬ꤋꤛꤢꤩ꤭ ꤢ꤬ꤙꤢꤧ꤬ꤕꤟꤛꤢꤙꤢꤧ꤬ꤏꤢꤧ꤭ ꤚꤢꤪ ꤢ꤬ꤥ꤬ꤠꤤ꤭ꤥ꤬ꤊꤢꤪ꤭ ꤊꤛꤢ꤭ꤡꤢꤪ꤯
ꤙꤤꤔꤌꤣ꤬ꤋꤢꤧ꤭ ꤢ꤬ ꤡꤛꤣ ꤊꤝꤟꤤ꤭ ꤗꤟꤢꤩ꤬ꤊꤟꤌꤣ꤭ ꤒꤟꤢꤧ꤬ꤗꤟꤢꤩ꤬ ꤘꤣ ꤢꤨ꤭ꤚꤌꤣ꤬ ꤥ꤬ ꤚꤢꤪ ꤟꤤ꤬ꤙꤛꤢ꤬ꤡꤢꤧ꤬ ꤔꤢꤪ꤭ ꤙꤟꤌꤣ꤬ ꤜꤢꤨ꤭ ꤓꤛꤢ ꤚꤢꤪ ꤕꤝꤟꤥ꤭ꤑꤢꤩ꤭ꤑꤢꤩ꤭ ꤢ꤬ꤙꤢꤧ꤬ ꤙꤟꤌꤣ꤬ ꤓꤛꤢ, ꤢ꤬ ꤙꤢꤧ꤬ ꤗꤛꤢꤋꤝꤢꤧ꤬ ꤔꤟꤤ ꤓꤛꤢ꤬ ꤒꤢ꤬ꤟꤢꤩ꤬꤯
ꤚꤢꤪ ꤙꤤ ꤢ꤬ ꤙꤟꤌꤣ꤬ꤢꤩ꤬ ꤓꤛꤢꤏꤢꤧ꤬ ꤔꤢ ꤊꤢꤪꤙꤤ꤭ꤊꤢꤪ꤭ꤙꤢꤧ꤬ ꤢ꤬ꤋꤢꤧ꤭ ꤢ꤬ ꤞꤢꤧꤢꤩ꤬ ꤡꤟꤛꤢꤩ꤭ꤊꤟꤌꤣ꤭ ꤔꤛꤢ꤬ꤡꤢꤪ, ꤗꤢ꤬ꤔꤢ ꤢꤨ꤭ ꤘꤛꤢꤩꤢꤩ꤬ ꤜꤢꤨ꤭ ꤏꤢꤧ꤬ꤢꤩ꤬ ꤒꤣ꤬ꤕꤚꤟꤢꤧ꤬꤮ ꤒꤥ꤬ ꤢ꤬ꤋꤢꤨ꤬ꤢ꤬ꤋꤛꤢꤩ꤭ ꤢ꤬ꤒꤢ꤬ꤔꤟꤢꤩ꤬ ꤓꤛꤢ꤬ꤒꤟꤌꤣ ꤋꤛꤢꤩ꤭ꤞꤛꤢ ꤔꤢ ꤢ꤬ ꤥ꤬ꤊꤟꤌꤣ꤭ ꤘꤣ ꤢ꤬ꤖꤢꤧꤟꤤ꤬ ꤚꤢꤪ ꤢ꤬ ꤥ꤬ꤗꤟꤥ꤬ꤥ꤬ꤚꤛꤢ ꤢ꤬ꤢꤩ꤬ꤊꤢꤪꤥ꤬ꤙꤢ꤭ ꤔꤢꤪ ꤔꤌꤣ꤬ꤒꤢ꤬ꤟꤢꤩ꤬꤯ ꤋꤥ꤭ꤑꤟꤢ ꤢ꤬ ꤥ꤬ꤠꤤ꤭ꤥ꤬ꤊꤢꤪ꤭ ꤜꤢ꤬ꤊꤥ꤭ ꤚꤢꤪ ꤞꤛꤢꤡꤢꤪꤔꤢ ꤢ꤬ꤊꤟꤢꤦꤚꤟꤢꤩ ꤞꤛꤢꤩ꤭ꤒꤢ꤬ꤜꤤ꤮ ꤡꤢꤪ ꤟꤢꤪ꤯
ꤙꤤꤔꤌꤣ꤬ꤋꤢꤧ꤭ ꤢ꤬ꤞꤢꤧꤑꤢꤩ꤭ꤜꤟꤛꤢ꤬ ꤔꤟꤤ ꤋꤛꤢꤩ꤭ꤞꤛꤢ ꤘꤢꤦ꤬ ꤢ꤬ꤒꤟꤢꤧ꤬ꤞꤢꤦ ꤒꤢ꤬ꤟꤢꤩ꤬ ꤚꤢꤪ “ꤋꤥ꤭ꤑꤟꤢ ꤠꤢ꤭ ꤙꤢꤧ꤬꤮ ꤊꤟꤢ꤬ꤋꤛꤢꤩ꤭ ꤋꤛꤢꤩ꤭ꤞꤛꤢ ꤔꤛꤢ꤭ꤟꤢꤪ ꤘꤣ ꤠꤢ꤭ꤖꤢꤧ꤭ ꤢ꤬ꤥ꤬ ꤟꤢꤪ ꤚꤢꤪ ꤠꤢ꤭ ꤊꤟꤢ꤬ ꤊꤝꤤ꤭ꤞꤢꤧꤐꤟꤢꤪ꤬ ꤋꤛꤢꤩ꤭ ꤠꤢ꤭ꤖꤢꤧ꤭ ꤕꤢ꤭, ꤓꤌꤣ꤭ꤒꤥ꤬ ꤠꤢ꤭ ꤊꤢꤪ꤬ ꤕꤢ꤭ꤡꤢꤪ ꤔꤢ ꤖꤢꤨ ꤒꤣ꤬ꤕꤚꤟꤢꤧ꤬ ꤢ꤬ꤋꤢ꤭ꤜꤟꤢꤩꤒꤥ꤬ ꤢ꤬ꤋꤢꤨ꤬ꤢ꤬ꤋꤛꤢꤩ꤭ ꤙꤢꤩ꤬ꤊꤛꤢ꤭ ꤠꤢ꤭ ꤖꤢꤨ꤮ ꤡꤟꤢꤦ ꤒꤣ꤬ꤕꤚꤟꤢꤧ꤬ ꤔꤌꤣ꤬ ꤠꤢ꤭ ꤊꤟꤢ꤬ ꤟꤢꤩ ꤜꤢꤨ꤭ ꤖꤢꤨꤔꤌꤣ꤬ ꤕꤢ꤭” ꤢ꤬ ꤒꤢ꤬ꤔꤟꤢꤩ꤬ ꤔꤟꤤ ꤢ꤬ꤒꤟꤢꤧ꤬ ꤖꤢꤨ ꤔꤌꤣ꤬ ꤚꤢꤪ ꤢ꤬ꤊꤟꤢ꤬ꤋꤛꤢꤩ꤭ ꤋꤛꤢꤩ꤭ꤞꤛꤢ ꤘꤣ ꤢ꤬ꤖꤢꤧ꤭ ꤥ꤬꤯
ꤙꤤ ꤢ꤬ꤊꤟꤢ꤬ꤖꤢꤦ꤬ ꤟꤢꤪ ꤘꤣ ꤢ꤬ꤖꤢꤧ꤭ ꤠꤟꤤ꤭ꤓꤢꤦ꤭ ꤢ꤬ꤋꤢꤧ꤭ꤔꤌꤣ꤬ ꤢ꤬ꤖꤢꤧ꤭ ꤥ꤬ꤕꤟꤢꤪ ꤗꤛꤢꤏꤢꤦ꤬ ꤜꤢꤨ꤭ ꤘꤣ ꤊꤜꤛꤢꤜꤟꤥ꤬ ꤚꤢꤪ ꤢ꤬ ꤗꤛꤢꤓꤛꤢꤩ꤬ ꤡꤛꤣꤜꤣ꤭ ꤜꤢꤨ꤭ꤜꤢꤨ꤭ ꤔꤢ ꤒꤣ꤬ꤖꤟꤌꤣꤒꤟꤌꤣ꤭ ꤢ꤬ꤖꤢꤧ꤭ ꤞꤢꤧꤊꤚꤟꤢꤦ꤭ꤞꤢꤧꤜꤟꤢꤪ꤭ ꤊꤜꤟꤛꤢ꤬ꤡꤛꤣ ꤖꤛꤢꤏꤢꤦ꤬ꤜꤢꤨ꤭꤯
ꤚꤢꤪ ꤢ꤬ꤗꤟꤥ꤬ꤒꤢ꤬ꤜꤝꤥ꤮ ꤏꤢꤦꤜꤢꤦ꤭ ꤢ꤬ꤖꤢꤧ꤭ ꤢ꤬ꤋꤢꤨ꤬ꤢ꤬ꤋꤛꤢꤩ꤭ ꤢ꤬ꤗꤟꤢꤩ꤬ꤞꤛꤢꤩ꤭ ꤕꤢꤩ ꤜꤢꤨ꤭ ꤕꤟꤢꤨ ꤘꤣ ꤢ꤬ꤙꤢꤦ꤬ꤜꤣ ꤒꤢ꤬ꤟꤢꤩ꤬ ꤚꤢꤪ ꤢ꤬ꤗꤟꤢꤩ꤬ꤕꤝꤟꤢꤧ꤬ꤗꤟꤢꤩ꤬ꤜꤢ꤭ ꤕꤢꤩ ꤡꤢꤪ ꤜꤢꤨ꤭꤯ ꤖꤢꤨ꤮ ꤖꤢꤨꤊꤢ꤬ꤑꤢ ꤒꤟꤢꤧ꤬ꤒꤢ꤬ꤔꤢꤩ꤬ ꤔꤌꤣ꤬ ꤢ꤬ꤋꤥꤋꤛꤢꤩ꤬ ꤔꤛꤢ꤬ꤡꤢꤪ ꤢ꤬ꤋꤢꤨ꤬ꤢ꤬ꤋꤛꤢꤩ꤭ ꤢ꤬ ꤊꤟꤢ꤬ꤥ꤬ꤒꤟꤌꤣ ꤥ꤬ꤗꤟꤥ꤬ꤥ꤬ꤚꤛꤢ ꤋꤛꤢꤩ꤭ꤞꤛꤢ ꤙꤤ ꤢ꤬ꤖꤢꤧ꤭ ꤥ꤬ ꤔꤌꤣ꤬꤯
